Autoritetet greke realizuan një operacion të rëndësishëm antidrogë në zonën e Pireut, duke sekuestruar rreth 219 kilogramë kanabis të llojit “skunk” dhe arrestuar tre persona, pjesë e një rrjeti të dyshuar greko-shqiptar të trafikut të drogës.

Operacioni nisi mëngjesin e 9 marsit, pas informacioneve për dërgesa të mëdha droge që po hynin në Greqi nga Spanja. Kontrolli i kryer në ambientet e një kompanie transporti në Atikën Perëndimore zbuloi dy arka druri me 108 pako plastike kanabis, rreth 122 kilogramë, të fshehura në hapësira të krijuara posaçërisht. Një ditë më pas, u gjetën edhe dy arka të tjera me 85 pako shtesë, rreth 96 kilogramë kanabis.

Autoritetet organizuan një dorëzim të kontrolluar të drogës për të identifikuar marrësit. Dy persona u kapën në momentin që hynin me një furgon në një depo nëntokësore në Athinë: një 42-vjeçar grek dhe një 46-vjeçar shqiptar. Në depo u gjetën mjete që dyshohet se përdoren për hapjen dhe izolimin e arkave, ndërsa 42-vjeçarit i sekuestruan një shkop policor të palosshëm dhe një thikë.

Një arrestim i tretë u bë në zonën e Nikeas në Atikë, ku u kap një 58-vjeçar grek që kishte dhënë me qira magazinën ku ruheshin arkat. Në ambientet e biznesit të tij u sekuestruan peshore precize, laptopë, numërues kartëmonedhash, telefona celularë dhe karta SIM, si dhe shumë çanta udhëtimi.

Vlera e drogës së sekuestruar llogaritet të kalojë 750 mijë euro. Gjatë operacionit u sekuestruan gjithashtu një automjet, gjashtë telefona celularë dhe 3,600 euro cash, ndërsa hetimet për rrjetin e trafikut vijojnë.