Një atentat është tentuar ndaj ish-kryeministrit të rajonit indian Jammu dhe Kashmir, Farooq Abdullah, gjatë një ceremonie martesore në qytetin Jammu. Sipas mediave ndërkombëtare, një person ka qëlluar me armë zjarri drejt tij nga një distancë shumë e afërt.

Fatmirësisht, plumbi nuk e ka goditur Abdullahun, ndërsa truprojat dhe komandot e Gardës Kombëtare të Sigurisë (NSG) kanë ndërhyrë menjëherë duke neutralizuar autorin dhe shmangur një tragjedi.

I dyshuari është identifikuar si Kamal Singh Jamwal, 63 vjeç, i cili u arrestua në vendngjarje. Gjatë marrjes në pyetje, ai deklaroi se kishte pritur prej vitesh për të kryer sulmin dhe se veprimi i tij lidhej me një “agjendë personale”.

Pas të shtënave, disa nga të pranishmit në ceremoni e kanë goditur autorin, ndërsa policia e ka marrë në kontroll dhe e ka shoqëruar për hetime të mëtejshme.

Për ngjarjen reagoi edhe kryeministri aktual i rajonit, Omar Abdullah, djali i ish-kryeministrit, i cili në një reagim publik tha se babai i tij shpëtoi për mrekulli nga atentati.

Autoritetet kanë nisur hetimet për të zbardhur plotësisht rrethanat dhe motivet e sulmit.