Dhjetëra qytetarë u mblodhën mbrëmjen e së premtes në qendër të qytetit të Lezhës për të bërë homazhe në kujtim të Xhuana Nikollaj, 25-vjeçares që ndërroi jetë pas një episode dhune nga ish-partneri i saj, Eraldo Fizi.

Ngjarja u zhvillua pranë “Obeliskut”, ku të afërm, miq dhe qytetarë ndezën qirinj dhe vendosën buqeta me lule, duke qëndruar për disa minuta në heshtje dhe shprehur dhimbjen dhe solidaritetin e tyre me familjen e të ndjerës. Shumë prej tyre kërkuan zbardhjen e plotë të rrethanave të ngjarjes dhe drejtësi për viktimën.

Një e afërme e Xhuanës rrëfeu se vajza kishte planifikuar të nisë një punë të re në Tiranë vetëm një ditë pas ngjarjes tragjike. Sipas saj, kur familjarët zbuluan dhunën që Xhuana kishte përjetuar nga ish-partneri, ata ndërhynë menjëherë për ta mbrojtur, duke e marrë në shtëpi dhe siguruar mbrojtje. Ajo kishte vendosur të zhvendosej në Tiranë për të nisur një jetë të re dhe për të filluar punën e re, duke shikuar jetën me një këndvështrim tjetër.

“Kam 1 mijë mesazhe për gratë dhe vajzat që të mos heshtin, por të flasin. Ka ndryshuar koha, tani janë të lira,” tha e afërmja e saj, duke theksuar rëndësinë e ndërgjegjësimit për dhunën ndaj grave dhe vajzave.

Ngjarja ka tronditur komunitetin e Lezhës, i cili u mblodh për të treguar dhimbjen e përbashkët dhe për të mbështetur familjen e të ndjerës, ndërsa presin që drejtësia të japë përgjigjen e saj për këtë humbje të parakohshme.