Kryeministri Edi Rama zhvilloi sot një takim me furnizuesit e naftës, duke theksuar se qëllimi kryesor është mbrojtja e konsumatorëve nga ndikimet e krizës globale. Ai njoftoi se nuk do të ngrihet një bord për monitorimin e çmimeve, por i kërkoi industrisë të ruajë ekuilibrin duke pranuar një marzh më të ulët fitimi.

“Ne qëllimin nuk e kemi t’ju shtrëngojmë juve, por të merremi vesh që kriza në Lindjen e Mesme s’mund të interpretohet e gjitha në supet e konsumatorëve. Më mirë marzhin me fitim më të ulët se bordin në kurriz,” deklaroi Rama, duke bërë thirrje për dialog dhe bashkëpunim mes shtetit dhe furnizuesve.

Ministrja e Ekonomisë, Delina Ibrahimaj, shtoi se çmimet e karburanteve dhe produkteve të tjera janë nën monitorim të vazhdueshëm për të shmangur çdo abuzim, duke paralajmëruar se autoritetet do të ndërhyjnë nëse ka luhatje të pakontrolluara në treg.