Mes përshkallëzimit të konfliktit në Lindjen e Mesme, Mossad ka shtuar aktivitetin në rrjetet sociale për të rekrutuar individë brenda Iran, duke synuar mbledhjen e informacioneve kundër regjimit.

Sipas raportimeve, shërbimi izraelit i inteligjencës ka hapur në mënyrë diskrete një kanal në Telegram që nga fundi i dhjetorit, i cili operon në gjuhën persiane dhe lidhet drejtpërdrejt me faqen zyrtare të institucionit. Përveç kësaj, janë identifikuar edhe llogari të lidhura në platforma si Instagram, Facebook dhe LinkedIn.

Në përshkrimin e kanalit thuhet: “Mirë se vini! Nëse keni arritur deri këtu, ndoshta është sepse doni të na kontaktoni”, ndërsa përdoruesve u jepen udhëzime të detajuara për mënyrën e komunikimit.

Më 6 mars, kanali – i cili numëron rreth 48 mijë ndjekës – publikoi një mesazh duke inkurajuar qytetarët iranianë të raportojnë zhvillimet nga brenda vendit: “Vazhdoni të dërgoni raportet tuaja nga terreni. Ju jeni dëshmitarët e së vërtetës. Ne do të vazhdojmë deri në fitore”.

Eksperti izraelit i sigurisë dhe gazetari Yossi Melman thekson se Mossadi ka një histori të gjatë në përdorimin e metodave të tilla, duke u përshtatur me teknologjitë dhe mjetet më të fundit për operacione inteligjence.

Zhvillimi vjen në një moment tensionesh të larta në rajon, ku lufta e informacionit dhe operacionet kibernetike po bëhen gjithnjë e më të rëndësishme krahas përballjeve ushtarake në terren.