Kryeministri Edi Rama, në fjalën e tij gjatë Asamblesë së Partisë Socialiste, ka bërë të ditur planet e qeverisë për të propozuar ligjin për referendumet dhe për të ulur numrin e deputetëve, duke e konsideruar këtë një hap drejt përfshirjes së qytetarëve në vendimmarrje direkte.

“Ne do ta zbresim numrin e deputetëve… dhe duhet të thërrasim shqiptarët në referendum ndaj duhet të çojmë para ligjin e munguar për referendumet”, tha Rama, duke theksuar se ligji i ri është i realizueshëm brenda këtij sesioni parlamentar.

Kryeministri gjithashtu theksoi progresin e Shqipërisë në integrimin europian dhe e cilësoi raportin e Komisionit Europian si “të shkëlqyer”. Ai ironizoi kritikat e opozitës, duke vënë në dukje se “nuk ka mërgatë qyqesh në Berlin e Bruksel që na ndal”.

Rama shtoi se reforma e administratës zgjedhore dhe depolitizimi i saj janë pjesë e planit për të garantuar transparencën: “Ne duhet ta bëjmë depolitizimin e plotë të administratës zgjedhore, duan apo s’duan ata që kurrë mos dacin. Mbase ka mbetur i vetmi vend në Europë me administratë politike të komisioneve zgjedhore.”

Ai përfundoi fjalën duke e lidhur këtë fazë me sfidat historike dhe rëndësinë e qëndrueshmërisë: “Historia do të mbajë mend vetëm një emër, PS, kohën e reformës dhe pavarësimit të drejtësisë. Duhet të përballemi me llumin që na vjen nga katër anët.”