Drejtoresha e përgjithshme e Agjencia Shtetërore e Kadastrës, Lorena Goxhobelli, ka raportuar për më shumë se tre orë para grupit parlamentar socialist dhe anëtarëve të qeverisë mbi ecurinë e reformave në sektorin e pronësisë.

Gjatë prezantimit, Goxhobelli theksoi se viti 2025 ka sjellë përparim të ndjeshëm në dy drejtime kyçe: digjitalizimin e sistemit kadastral dhe regjistrimin fillestar të pronave.

“Sot kemi të digjitalizuara rreth 90% të kartelave të pronësisë dhe janë skanuar rreth 54 milionë faqe dokumentacion,” u shpreh ajo, duke shtuar se puna vijon për krijimin e një kadaste plotësisht digjitale brenda vitit 2026, me mbështetje financiare nga Bashkimi Evropian dhe asistencë teknike nga UNOPS.

Sa i përket regjistrimit fillestar, ajo bëri të ditur se objektivi për qershor 2026 pritet të tejkalohet, duke arritur në rreth 96.5% të territorit të regjistruar.

“Qëllimi ynë është që deri në vitin 2027 të kemi një regjistër të plotë të titujve të pronësisë në të gjithë vendin,” deklaroi Goxhobelli.

Në fokus të raportimit ishte edhe rritja e shërbimeve për qytetarët, ku gjatë vitit 2025 janë ofruar rreth 2.5 milionë shërbime, ndërsa zgjerimi i proceseve të automatizuara synon më shumë transparencë, shpejtësi dhe reduktim të burokracisë.