Një ngjarje e rëndë tronditi pasditen e sotme lagjen “Pavarësia” në Vlorë, pranë rrugës “Çipajve”, ku 63-vjeçari Ismail Aliaj ka ndërruar jetë pas një përleshjeje me dy persona të identifikuar tashmë nga policia.

Burime mjekësore bëjnë me dije se viktima ka marrë goditje të forta në fytyrë dhe grykë, të cilat i kanë rezultuar fatale. Djali i tij, i cili ishte i pranishëm gjatë ngjarjes, ka marrë lëndime të lehta dhe ndodhet jashtë rrezikut për jetën.

Policia e Vlorës ka nisur një operacion për kapjen e autorëve dhe po vijon hetimet për zbardhjen e plotë të rrethanave. Ngjarja dyshohet se ka ndodhur pas një konflikti të çastit për motive të dobëta, ndërsa grupi hetimor po punon intensivisht në vendngjarje.

Rruga “Çipajve” mbeti për disa orë e bllokuar ndërsa autoritetet mblodhën provat dhe intervistuan dëshmitarët. Ngjarja ka tronditur komunitetin lokal, duke rikthyer vëmendjen tek problemet e sigurisë në zonë.