Kryetari i Partisë Demokratike, Sali Berisha, akuzoi sot qeverinë për kontrabandë masive me naftën që vjen nga Libia, duke e cilësuar këtë si një nga arsyet kryesore të çmimit të lartë të karburantit në Shqipëri.

“Kontrabandën nuk mund ta bëjë njeri tjetër përveç qeverisë. Nafta vjen me anije, ato kapen dhe mbyllen, sepse janë anijet e qeverisë. Nëse ti e taton 60 përqind të çmimit litrin, bën një plaçkitje masive të shqiptarëve. Pra, dy janë faktorët kryesorë të çmimit ndëshkues të litrit të naftës: ngarkesa fiskale më e lartë në botë dhe kontrabandë qeveritare,” deklaroi Berisha.

Ai theksoi se, sipas të dhënave të tij, çdo vit zhduken 350 mijë ton naftë dhe se çmimet në Shqipëri janë ndjeshëm më të larta krahasuar me rajonin: “1.1 euro dora e shtetit merr për litër nafte nga qytetari. Në Maqedoni dhe Kosovë, çmimet janë të paktën 40 përqind më të ulëta.”

Berisha akuzoi qeverinë se po penalizon familjet shqiptare dhe fermerët përmes taksave të larta dhe një menaxhimi të dyshimtë të importit të karburanteve, duke e cilësuar situatën si një “kontrabandë qeveritare” dhe një “plaçkitje masive”.