Shkodër – Një rast i kultivimit të bimëve narkotike është goditur nga policia në zonën e Dajçit, ku janë arrestuar dy shtetas, babë e bir.

Gjatë kontrolleve në fshatin Mali i Gjymtit, shërbimet e Komisariatit të Policisë Shkodër zbuluan një parcelë me fidanë të dyshuar kanabisi të sapombjellë, në vendin e njohur si “Këneta”, në njësinë administrative Dajç.

Në pranga janë vënë shtetasit me inicialet P. D., 60 vjeç dhe A. D., 41 vjeç, të cilët dyshohen si autorë të kultivimit të një numri të konsiderueshëm fidanësh narkotikë.

Policia bëri me dije se operacioni u zhvillua në kuadër të planit operacional “Faza e parë”, që synon parandalimin dhe goditjen e tentativave për kultivim të lëndëve narkotike që në fazat fillestare.

Fidanët e dyshuar janë sekuestruar në cilësinë e provës materiale, ndërsa hetimet vijojnë për të dokumentuar plotësisht këtë veprimtari kriminale dhe për të identifikuar persona të tjerë të mundshëm të përfshirë.