Partia Demokratike e Shqipërisë ka publikuar një udhëzim të ri për angazhimin e strukturave të saj në diskutimet mbi reformën administrative dhe territoriale në të gjithë vendin.

Dokumenti parashikon një plan konkret veprimi për degët lokale, me synim përfshirjen e qytetarëve, ekspertëve dhe përfaqësuesve vendorë në hartimin e një ndarjeje të re territoriale.

Sipas udhëzimit, strukturat e partisë do të organizojnë dëgjesa me komunitetet vendore, ndërsa deri më 15 prill duhet të zhvillohen mbledhjet e kryesive në çdo degë për të diskutuar variantet e reformës.

Më tej, kërkohet që propozimet të finalizohen dhe të raportohen deri më 20 prill, të shoqëruara me dokumentim nga takimet në terren. Në këtë proces do të përfshihen edhe këshilltarë vendorë, ekspertë dhe përfaqësues të zgjedhur lokal.

Në dokument theksohet se një ndarje e re territoriale më pranë qytetarëve konsiderohet çështje me rëndësi të veçantë politike, ndërsa procesi shihet si një hap kyç drejt riorganizimit të qeverisjes vendore.