Detaje të reja kanë dalë në lidhje me ngjarjen tragjike ku një 31-vjeçar ka humbur jetën, dyshohet si pasojë e kontaktit me rrymën elektrike në zonën e Vrionit. Viktima është Igli Gjoca, banues në Bajkaj të Delvinës, i cili ushtronte aktivitetin e tij si pronar i një servisi automjetesh.

Sipas informacioneve paraprake, i riu është transportuar me urgjencë drejt spitalit të Sarandës menjëherë pas incidentit, por nuk ka arritur t’u mbijetojë plagëve të marra.

Autoritetet kanë nisur hetimet për të zbardhur rrethanat e plota të ngjarjes dhe për të përcaktuar shkaqet e sakta të aksidentit.

Ngjarja ka shkaktuar dhimbje të madhe te familjarët dhe komuniteti. Viktima ishte i martuar dhe priste të bëhej baba, çka e ka bërë humbjen edhe më të rëndë për të afërmit dhe miqtë e tij.