Një ngjarje e rëndë është regjistruar sot në rrugën “Remzi Hoxha” në Ferizaj, ku një punëtor ka humbur jetën pas një aksidenti në punë.

Sipas njoftimit të policisë, viktima, rreth 59 vjeç, dyshohet se ka rënë nga kati i gjashtë i një objekti në ndërtim gjatë kryerjes së punimeve. Ekipet emergjente kanë dalë menjëherë në vendngjarje, por kanë konstatuar vdekjen e tij.

Autoritetet kanë bërë të ditur se në vend janë angazhuar hetimet, forenzika rajonale dhe inspektorët komunal të punës për të sqaruar rrethanat e plota të incidentit.

Policia ka siguruar zonën dhe po vijon mbledhjen e provave, ndërsa priten detaje të mëtejshme nga hetimet në vijim.