Trajtimet që forcojnë sistemin imunitar për të luftuar kancerin po zhvillohen me ritme të shpejta dhe po konsiderohen si një nga drejtimet më premtuese të mjekësisë moderne.

Imunoterapia funksionon duke aktivizuar sistemin imunitar të trupit për të identifikuar dhe shkatërruar qelizat kancerogjene, të cilat shpesh arrijnë të shmangin ose të “mashtrojnë” mekanizmat natyralë të mbrojtjes.

Megjithatë, ekspertët theksojnë se kjo metodë nuk është universale. Aktualisht, vetëm një pjesë e pacientëve, rreth 20% deri në 40%, përfitojnë ndjeshëm prej saj, ndërsa të tjerët mund të mos reagojnë ose të përjetojnë efekte anësore si lodhje, skuqje apo inflamacion.

Studiuesit po punojnë për të rritur efektivitetin e këtyre trajtimeve përmes kombinimeve me terapi të tjera, si dhe përmes qasjeve të reja si mjekësia e personalizuar, ku trajtimi përshtatet sipas profilit gjenetik të tumorit të çdo pacienti.

Një tjetër drejtim në zhvillim janë vaksinat kundër kancerit, të cilat synojnë të “trajnojnë” sistemin imunitar për të njohur dhe sulmuar qelizat tumorale në mënyrë më specifike.

Edhe pse ende në fazë studimesh për shumë lloje tumoresh, rezultatet e hershme konsiderohen premtuese dhe tregojnë se e ardhmja e trajtimit të kancerit mund të jetë më e synuar dhe më pak invazive.