Zëvendëskryeministri dhe ministri i Punëve të Jashtme dhe Diasporës së Kosovës, Glauk Konjufca, gjatë Samitit të Diasporës në Tiranë, u ndal te nevoja për projekte të përbashkëta mes Shqipërisë dhe Kosovës në mbështetje të diasporës shqiptare.

Ai tha se diaspora shqiptare është e përqendruar kryesisht në pesë shtete, ku sipas tij duhet të fokusohet edhe bashkëpunimi institucional.

“Në SHBA kemi një mërgatë përafërsisht të barabartë mes Kosovës dhe Shqipërisë, edhe pse mërgata e Shqipërisë është më e hershme. Në Greqi dhe Itali dominon mërgata e Shqipërisë, ndërsa në Gjermani dhe Zvicër mërgata e Kosovës”, u shpreh Konjufca.

Ai theksoi se në këto vende duhet të ketë investime të përbashkëta për ruajtjen e identitetit kombëtar, veçanërisht në arsimin në gjuhën shqipe.

“Arritja më e madhe do të ishte sikur së bashku me Shqipërinë të dërgonim një numër të madh mësimdhënësish që mbulohen financiarisht nga të dyja shtetet. Duhen me qindra mësimdhënës për të mirëmbajtur shkollën shqipe në ato qytete ku jeton mërgata jonë”, tha ai.

Konjufca shtoi se deri tani mësimi i gjuhës shqipe në diasporë është mbështetur kryesisht në baza vullnetare dhe se pjesëmarrja mbetet e ulët.

“Sot vetëm 10% e fëmijëve të diasporës ndjekin shkollimin në gjuhën shqipe”, u shpreh ai.

Ai vuri theksin edhe te nevoja për rrjetëzim të organizatave shqiptare jashtë vendit, duke propozuar krijimin e një strukture të përbashkët koordinuese mes shoqatave në diasporë dhe institucioneve në Shqipëri e Kosovë.