Kryetarja e Komisionit të Diasporës në Kuvend, Ina Zhupa, ka reaguar në hapjen e Komisionit të Diasporës lidhur me Samitin e Diasporës që po zhvillohet në Tiranë, duke ngritur shqetësime për mungesë përfshirjeje dhe transparence.

Në një postim në Facebook, Zhupa deklaroi se komisioni nuk është përfshirë në organizim dhe se sipas saj, aktiviteti po përdoret për qëllime politike.

“Samiti ishte një moment shumë i rëndësishëm për të kuptuar qasjen e politizuar që ka qeveria ndaj diasporës dhe përdorimin politik që do t’i bëjë këtij samiti për propagandë elektorale, dhe aspak për përfshirjen reale apo një qasje shtetërore për angazhimin e diasporës në zhvillimin e vendit”, shkruan Zhupa.

Ajo shprehet e keqardhur që, sipas saj, pjesëmarrës të shumtë kanë ardhur me pritshmëri për një diskutim serioz, por janë përballur me një qasje ndryshe.

“Jam e keqardhur që njerëz të ndritur, njerëz që kanë besuar se samiti mund të ishte serioz, kanë ardhur dhe janë përfshirë, por gjenden përballë propagandës qeveritare, përballë sloganeve si ‘Shqipëria 2030’”, vijon ajo.

Zhupa shton se mungon një qasje shtetërore gjithëpërfshirëse dhe se diaspora, sipas saj, nuk po trajtohet si partner real në zhvillimin e vendit, por në një formë të centralizuar përfaqësimi.