Ministrja e Shtetit për Administratën Publike dhe Antikorrupsionin, Adea Pirdeni, deklaroi se procesi i integrimit të Shqipërisë në Bashkimin Evropian mund të përshpejtohet përmes angazhimit të diasporës.

Gjatë panelit “Rrënjët që rikthejnë vlerë. Nga përvoja ndërkombëtare në administratë publike”, në kuadër të Samitit të Diasporës, ajo theksoi se bashkëpunimi me shqiptarët jashtë vendit është thelbësor për ecurinë e negociatave.

Pirdeni vlerësoi se Shqipëria dhe Mali i Zi janë aktualisht ndër vendet më të avancuara në procesin e integrimit evropian, ndërsa nënvizoi se sfidat mbeten të mëdha, por të adresueshme.

“Është e rëndësishme që në këtë fazë të procesit të jemi të fuqizuar dhe të shtrijmë dorën për të bashkëpunuar me ata që jetojnë jashtë Shqipërisë, por që me zemër dhe shpirt janë gjithmonë të angazhuar për zhvillimet në vendin tonë”, u shpreh ministrja.

Ajo i bëri thirrje profesionistëve dhe të rinjve shqiptarë në diasporë që të kontribuojnë në procesin e integrimit dhe zhvillimit të vendit.

Në lidhje me negociatat me BE-në, Pirdeni njoftoi edhe një masë të re organizative, duke theksuar se qeveria ka vendosur krijimin e dy këshilltarëve të dedikuar për çdo ministri, të cilët do të angazhohen drejtpërdrejt në procesin e negociatave.