Zjarri që shpërtheu sot në një kompleks pallatesh të ndërtuar nga kompania “Arlis SHPK”, në pronësi të Armand Lilos, pranë zonës së Farmacisë nr. 10, ka rikthyer në vëmendje shqetësimet për sigurinë në ndërtim dhe respektimin e standardeve teknike.

Sipas inxhinierit Romeo Nazarko, situata ishte paralajmëruar më herët nga specialistë të fushës, por nuk është marrë parasysh nga institucionet përgjegjëse.

“E kemi paralajmëruar këtë situatë, por vazhdojnë me papërgjegjshmëri të mos dëgjojnë. E keqja është që nuk dëgjojnë as inxhinierët, kur kapin ndonjë post drejtues”, shkruan ai në një reagim publik.

Nazarko ka bërë gjithashtu publike një kërkesë për informacion drejtuar Kuvendit, që lidhet me një tjetër rast të mëparshëm të djegies së fasadës së një pallati në Tiranë, duke ngritur pikëpyetje mbi standardet e ndjekura në projektim dhe zbatim të punimeve.

Ngjarja e sotme nuk ka shkaktuar viktima, por ka sjellë dëme materiale dhe ka nxitur reagime të reja mbi sigurinë në ndërtimet shumëkatëshe në kryeqytet.