Vdekja e 19-vjeçares shqiptare në ishullin Kefalonia po hetohet me zhvillime të reja, pasi janë bërë publike mesazhe dhe dëshmi që hedhin dritë mbi orët e fundit të saj.

Sipas mediave greke, një 66-vjeçar nga Preveza ka dhënë një dëshmi të detajuar para autoriteteve, ku shpjegon se kishte komunikuar me vajzën përmes WhatsApp-it dhe video-telefonatave. Ai pretendon se kontaktet mes tyre kishin nisur si biseda “me karakter shoqëror”, përfshirë edhe një grup me një 23-vjeçar tjetër, me të cilin vajza kishte pasur kontakt më herët.

Sipas dëshmisë së tij, më 13.04.2026 në orën 23:38 ai ka marrë një video-telefonatë 13-minutëshe nga profili i vajzës, gjatë së cilës ajo i është shfaqur në gjendje të rënduar psikologjike dhe i ka thënë se kishte dalë nga shtëpia dhe do të flinte në stola, duke shtuar se nuk kishte para me vete.

“Unë i sugjerova të kthehej në shtëpi ose te një shoqe, por ajo tha se nuk kishte askënd dhe do të qëndronte në stola, gjë që e ka bërë edhe më parë,” ka deklaruar ai.

Ai shton se më pas i ka propozuar t’i dërgonte para për të kaluar natën në hotel dhe për të reflektuar më pas. Sipas tij, i ka kërkuar një llogari bankare dhe ajo i ka sugjeruar transferim përmes IRIS, ku ai ka dërguar 220 euro.

“Kur i dërgova paratë, pashë edhe mbiemrin e saj, të cilin nuk e dija më parë,” ka deklaruar ai në dëshmi.

Ai ka përshkruar edhe komunikimin e fundit në orën 04:02 të 14/04/2026, një bisedë dy-minutëshe pas një tjetër video-telefonate, ku thotë se e pa vajzën të shtrirë në një dhomë dhe në gjendje më të mirë se më herët.

Sipas tij, telefonata u ndërpre papritur pasi në dhomë hyri një person tjetër, ndërsa fjala e fundit që arriti të thotë ishte “Dimitris”, pa qenë i sigurt nëse u dëgjua plotësisht.

Pak më pas, ai thotë se u informua nga 23-vjeçarja se 19-vjeçarja ishte dërguar në spital dhe më vonë mësoi për vdekjen e saj.

Ndërkohë, 23-vjeçari tjetër i përfshirë në ngjarje nuk e konfirmon këtë version, duke deklaruar se takimi ka qenë normal dhe se më pas kanë shkuar në dhomën me qira për t’u çlodhur dhe për të bërë video në TikTok.

E reja me origjinë shqiptare humbi jetën në mënyrë tragjike në zonën e Argostolit në Kefalonia. Autoritetet greke dyshojnë për mbidozë droge, ndërsa tre persona janë marrë në hetim për sqarimin e rrethanave të plota të ngjarjes.