Avokati Arben Llangozi ka reaguar publikisht lidhur me akuzat për infektim me HIV/AIDS në Bashkinë e Gjirokastër, duke i cilësuar ato si të pavërteta dhe me prapavijë politike.

Në një intervistë për “Breaking”, Llangozi u shpreh se e gjithë situata ka nisur nga publikimi i një lajmi nga një qytetar, i cili më pas, sipas tij, është keqpërdorur nga eksponentë politikë për të goditur kryebashkiakun.

Sipas avokatit, Flamur Golemi ka kryer analizat më 20 dhjetor 2025 në një klinikë në Janinë, pas shqetësimeve shëndetësore, dhe rezultati ka qenë negativ. Ai theksoi se dokumenti i publikuar është autentik, edhe pse pa vulë dhe firmë, pasi kjo, sipas tij, është praktikë e institucioneve mjekësore në Greqi.

“Ky nuk është vetëm një rast shpifjeje, por një lajm që ka shkaktuar panik në të gjithë qytetin. Qytetarët janë trembur dhe madje kanë kërkuar shërbime mjekësore jashtë,” u shpreh Llangozi.

Ai shtoi se kryebashkiaku është i gatshëm për çdo verifikim shtesë dhe madje ka kërkuar që të identifikohen edhe personat e përmendur në lajme, për t’iu nënshtruar analizave përkatëse.

Avokati ngriti gjithashtu shqetësimin për diskriminim dhe përhapje paniku, duke theksuar se edhe nëse një rast i tillë do të ishte i vërtetë, askush nuk duhet të paragjykohet për gjendjen shëndetësore.

Sipas tij, rasti kërkon hetim të plotë për të zbuluar burimin e informacionit dhe për të identifikuar personat që kanë përhapur lajmin, ndërsa nënvizoi se kryebashkiaku aktualisht është në gjendje të mirë shëndetësore dhe i hapur për transparencë të plotë.