Autoritetet italiane kanë vendosur të arkivojnë hetimet për vdekjen e Klaudio Myrtaj, 34 vjeç, i cili humbi jetën në nëntor të vitit 2023 në Vernante të Cuneos, pas një të shtëne me armë zjarri.

Vendimi është marrë nga gjyqtarja hetuese Sabrina Nocente, e cila rrëzoi kërkesën e familjarëve për vijimin e hetimeve, duke i dhënë fund pistës së vrasjes së qëllimshme.

Sipas prokurorisë, rasti nuk konsiderohet vrasje, por një ngjarje e lidhur me një të shtënë të pasigurt, pa prova që të mbështesin një sulm të organizuar apo të qëllimshëm.

Klaudio Myrtaj u gjet i plagosur rëndë në oborrin e bashkisë dhe ndërroi jetë pak më vonë në spital, ndërsa autorësia e të shtënës mbetet e paidentifikuar.

Ekspertizat teknike kanë lënë të hapur dyshimin mes një aksidenti dhe një veprimi të qëllimshëm, por pa elemente të mjaftueshme për të ndryshuar kualifikimin ligjor të çështjes.

Arma e përdorur, një pistoletë kalibri .22, është gjetur më vonë në një sirtar në vendin e punës, pa gjurmë gishtash, duke e komplikuar më tej hetimin. Megjithë kërkesat e familjes për zbardhje të plotë të ngjarjes, çështja është mbyllur pa autor të identifikuar.