Këshilltari për çështjet ekonomike në Partinë Demokratike, Dorian Teliti, ka reaguar në rrjetet sociale duke ngritur kritika ndaj qeverisë për mënyrën e menaxhimit të situatës ekonomike në vend.

Sipas Telitit, ndryshe nga praktikat në vende të tjera ku qeveritë ndërhyjnë për të zbutur krizat, në Shqipëri po ndodh e kundërta, pasi sipas tij krizat po ndikojnë drejtpërdrejt në mënyrën e qeverisjes.

Ai rendit një sërë problematikash me të cilat përballen qytetarët, si vështirësitë në transport, rritja e çmimeve të ushqimeve dhe qirave, si dhe kostot në rritje për bizneset. Po ashtu, Teliti përmend edhe raste të abuzimeve me fondet publike, duke theksuar se mungon një reagim efektiv nga institucionet.

Në reagimin e tij, ai shprehet se qytetarët po përballen çdo ditë me sfida ekonomike, ndërsa qeveria, sipas tij, kufizohet vetëm në monitorimin e situatës pa ndërmarrë masa konkrete.

Teliti e cilëson këtë si një mungesë veprimi nga ana e institucioneve, që sipas tij po rëndon më tej ekonominë dhe mirëqenien e qytetarëve.