Donald Trump ka dhënë detaje të reja mbi incidentin me të shtëna që ndodhi gjatë darkës së Korrespondentëve të Shtëpisë së Bardhë, duke e cilësuar ngjarjen si një sulm ndaj një eventi kushtuar lirisë së fjalës.

Duke folur nga Shtëpia e Bardhë, ai deklaroi se një person i armatosur kishte tentuar të kalonte një pikë kontrolli sigurie me disa armë me vete. Sipas tij, autori u neutralizua nga agjentët e Shërbimit Sekret, të cilët ai i cilësoi si “shumë të guximshëm”.

“Një burrë i armatosur me disa armë u përpoq të kalonte kontrollin e sigurisë. Ai u neutralizua nga anëtarë shumë të guximshëm të Shërbimit Sekret”, u shpreh Trump.

Ai shtoi se gjatë ndërhyrjes një agjent u plagos, por shpëtoi falë jelekut antiplumb, ndërsa i dyshuari ndodhet tashmë në paraburgim. Trump e përshkroi atë si “një person shumë i sëmurë”, duke theksuar se kishte lëvizur me shpejtësi para ndërhyrjes së forcave të sigurisë.

Sipas tij, hetimet janë shtrirë edhe në Kaliforni, ku autoritetet kanë kontrolluar banesën e të dyshuarit për prova shtesë. Presidenti konfirmoi se vetë nuk është lënduar dhe se eventi do të riplanifikohet në një datë tjetër, duke shtuar se situata ka qenë traumatike edhe për Zonjën e Parë, Melania Trump.