Kreu i sistemit të arbitrimit në futbollin italian, Gianluca Rocchi, është vënë nën hetim për tre çështje që lidhen me dyshime për ndikim në caktimin e arbitrave dhe përdorimin e sistemit VAR, ndërsa mediat italiane raportojnë se ai ka vendosur të vetë-pezullohet nga detyra.

Sipas agjencisë AGI, hetimet përfshijnë disa episode të sezonit 2024–2025 në Serie A. Rasti i parë lidhet me ndeshjen Bologna–Inter, ku dyshohet se është ndikuar përzgjedhja e arbitrit Andrea Colombo.

Akuza e dytë ka të bëjë me gjysmëfinalen e Kupës së Italisë mes Milan dhe Inter, ku pretendohet se është ushtruar ndikim në caktimin e arbitrit Daniele Doveri për ndeshjen e kthimit.

Ndërsa rasti i tretë lidhet me sfidën Udinese–Parma, ku dyshohet ndërhyrje në sistemin VAR dhe sugjerim për rishikim të një episodi që solli akordimin e një penalltie.

Hetimet janë në vijim dhe pritet të hedhin dritë mbi rolin e Rocchit në këto vendimmarrje, ndërsa rasti ka ngritur debat të gjerë për transparencën dhe besueshmërinë e arbitrimit në futbollin italian.