Ministri i Jashtëm i Turqisë, Hakan Fidan, ka deklaruar se Izraeli po përbën tashmë një kërcënim të drejtpërdrejtë për sigurinë globale, duke kërkuar një reagim të përbashkët ndërkombëtar.

Duke folur në Universitetin e Oksfordit, Fidan u shpreh se bota nuk po përjeton thjesht një tranzicion gjeopolitik, por një transformim të thellë të rendit ndërkombëtar.

“Ajo që po dëshmojmë sot nuk është një tranzicion, por një transformim,” deklaroi ai, duke shtuar se shtetet nuk mund të delegojnë më sigurinë dhe strategjinë e tyre.

Ai iu referua gjithashtu tensioneve dhe konflikteve në Lindjen e Mesme, duke theksuar se luftërat e fundit kanë ndikuar rëndë në stabilitetin dhe prosperitetin global.

“Kërcënimi sistematik i Izraelit për të destabilizuar rajonin ka tejkaluar kufijtë lokalë,” u shpreh Fidan, duke kërkuar një përgjigje kolektive nga komuniteti ndërkombëtar.

Ministri turk theksoi gjithashtu se dallimi mes krizave rajonale dhe globale është zbehur, ndërsa vuri në dukje rolin në rritje të fuqive të mesme në menaxhimin e krizave ndërkombëtare, përfshirë edhe Turqinë nëpërmjet iniciativave diplomatike dhe rolit të saj në NATO.