Çështja e zgjedhjes së presidentit në Kosovë vijon të mbetet e bllokuar, për shkak të mungesës së një marrëveshjeje mes forcave politike.

Deputetja e Lëvizja Vetëvendosje, Fatmira Kollçaku, ka deklaruar se mazhoranca po bën përpjekje për të gjetur një figurë të përbashkët, ndërsa ka akuzuar opozitën për mungesë angazhimi konkret.

Sipas saj, pavarësisht se janë ndërmarrë hapa për arritjen e një konsensusi, opozita nuk ka paraqitur asnjë kandidaturë dhe nuk ka ofruar mbështetje për propozimet ekzistuese.

“Ne po bëjmë të gjitha përpjekjet që të arrihet një figurë e përbashkët… opozita nuk solli asnjë propozim,” u shpreh Kollçaku gjatë një interviste televizive.

E pyetur për mundësinë e kandidimit të Vjosa Osmani, ajo sqaroi se fillimisht Vetëvendosje kishte ofruar mbështetje për të, por sipas saj, kjo nuk u reciprocua nga partitë e tjera opozitare.

Në këto kushte, Kollçaku theksoi se mazhoranca është detyruar të shqyrtojë alternativa të tjera për të zgjidhur ngërçin politik që po zgjat.