Një nga shkeljet më të mëdha të sigurisë digjitale në historinë e sportit ka goditur futbollin ndërkombëtar, duke ekspozuar mbi 150 mijë dokumente personale të lojtarëve, trajnerëve dhe drejtuesve të njohur.

Sipas raportimeve ndërkombëtare, në rrjet janë publikuar të dhëna tepër të ndjeshme, përfshirë pasaporta, kontrata profesionale, adresa elektronike dhe informacione bankare. Mes emrave të prekur përmenden futbollistë të njohur si Son Heung-min, Lee Kang-in, Mehdi Taremi dhe Neymar Jr, si dhe presidenti i FIFA, Gianni Infantino.

Ekspertët e sigurisë e cilësojnë këtë si një ndër incidentet më serioze, duke paralajmëruar për pasoja të rënda, përfshirë rrezikun e vjedhjes së identitetit, mashtrimeve financiare dhe abuzimit me të dhënat personale.

Materialet e publikuara dyshohet se janë marrë përmes një depërtimi të drejtpërdrejtë në sistemet e brendshme të organizatave sportive dhe klubeve, pasi të dhënat janë të strukturuara në mënyrë të detajuar sipas shteteve dhe individëve.

Përgjegjësinë për sulmin e ka marrë grupi i hakerëve ShinyHunters, i cili e ka cilësuar këtë si “shkeljen më të madhe në historinë e futbollit”.

Hetimet vijojnë, ndërsa autoritetet dhe institucionet sportive ndërkombëtare pritet të marrin masa për forcimin e sigurisë kibernetike dhe mbrojtjen e të dhënave sensitive.