Gazetari Bledian Koka, i ftuar në një studio televizive, ka komentuar deklaratat e fundit të Elisa Spiropalit dhe dinamikat brenda Partisë Socialiste, duke i cilësuar ato si të mirëstrukturuara dhe të menduara politikisht.

Sipas Kokës, mënyra e artikulimit të Spiropalit nuk është e rastësishme, por e kalkuluar, ndërsa sfida e saj ndaj kryeministrit Edi Rama, sipas tij, mbart disa të panjohura politike.

“Mënyra se si Spiropali po artikulon është shumë e mirëmenduar dhe e mirëstrukturuar. Sfida që i bëri Ramës ka shumë të panjohura”, u shpreh Koka.

Ai shtoi më tej se, sipas tij, Spiropali mund të ketë informacion mbi zhvillime të reja që po vijnë dhe që mund të ndikojnë në ekuilibrat brenda Partisë Socialiste.

“Kam përshtypjen se Spiropali ka informacion për një gjë të re që po vjen dhe që mund të shkundë partinë”, deklaroi gazetari.

Duke komentuar edhe çështjen e pasuesit të kryeministrit Rama në krye të PS-së, Koka tha se ai nuk projekton pasardhës politikë.

“Rama nuk projekton pasues, kush është projektuar si pasues i tij ka përfunduar në burgun e Durrësit. Spiropali nuk është projektuar si pasuese”, tha ai.