Gjyqësori iranian ka konfirmuar ekzekutimin e një të ndaluari tjetër të arrestuar gjatë protestave të fundit, në një kohë kur raportohen tensione të larta dhe rritje e represionit.

Sipas mediave iraniane, Sassan Azadvar Joonqani, 21 vjeç, sportist karateje i arrestuar gjatë protestave të janarit, u ekzekutua në orët e para të mëngjesit në burgun Dastgerd në Isfahan.

Një burim pranë familjes së tij ka deklaruar se ceremonia e varrimit është zhvilluar nën masa të rrepta sigurie dhe se vetëm një numër i kufizuar familjarësh është lejuar të marrë pjesë.

Sipas agjencisë së lajmeve Mizan, e cila drejtohet nga gjyqësori iranian, i riu ishte dënuar për “bashkëpunim efektiv me armikun”, si dhe për sulme ndaj forcave të sigurisë gjatë protestave, përfshirë goditje me gurë dhe dëmtim të një automjeti.

Ndërkohë, Organizata e Kombeve të Bashkuara ka raportuar për të paktën 21 ekzekutime dhe mbi 4,000 arrestime që nga fillimi i protestave, duke paralajmëruar për rritje të përdorimit të dënimit me vdekje në vend.

Autoritetet iraniane nuk kanë dhënë detaje të tjera mbi çështjen, ndërsa organizatat ndërkombëtare të të drejtave të njeriut vijojnë të shprehin shqetësim për situatën.