Kryeministri i Shqipërisë, Edi Rama, ka mbërritur këtë të hënë në Jerevan, ku po zhvillohen punimet e Samitit të 8-të të Komunitetit Politik Europian, me pjesëmarrjen e 48 liderëve nga i gjithë kontinenti, si dhe për herë të parë edhe të Kanada.

Në një prononcim për mediat në hyrje të samitit, Rama theksoi rëndësinë e bashkëpunimit europian dhe nevojën për avancimin e procesit të integrimit.

“Është një tjetër samit dhe një tjetër mundësi për të ndarë ambiciet dhe shqetësimet tona të përbashkëta. Është një shans i madh për të parë se sa mund të bëjmë së bashku dhe sa e rëndësishme është të ecet përpara me bashkimin e Europës,” u shpreh ai.

I pyetur për negociatat me Bashkimin Europian, kreu i qeverisë shqiptare u shpreh se çështja nuk lidhet me përfitime të veçanta për vende të caktuara, por me vetë të ardhmen e unionit.

“Një Bashkim Europian që nuk është i plotë, është më i dobët dhe më i cenueshëm sesa një Bashkim Europian i cili është i plotë,” deklaroi Rama.

Ai theksoi gjithashtu se, në kushtet aktuale gjeopolitike, NATO duhet të mbështetet më shumë në komponentin europian.

Pas mbërritjes, Rama dhe delegacioni shqiptar u pritën nga kryeministri i Armeni, Nikol Pashinyan, në ambientet e Karen Demirchyan Complex, ku po zhvillohen punimet e samitit.