Pas aksidentit tragjik që tronditi Durrësin dhe opinionin publik, ku humbën jetën dy fëmijë dhe një tjetër mbeti i plagosur rëndë, kanë reaguar për herë të parë familjarët e autorit të ngjarjes.

Fëmijët e 57-vjeçarit Nikoll Radaçi kanë shprehur dhimbjen e thellë për ngjarjen dhe kanë kërkuar falje publike ndaj familjeve të viktimave, duke e cilësuar tragjedinë si një barrë të rëndë që do t’i shoqërojë gjatë gjithë jetës.

“Sot dalim përpara familjeve të viktimave me një dhimbje shumë të madhe dhe me një barrë të rëndë në zemër. Në emrin tonë dhe të familjes sonë, kërkojmë falje publike për tragjedinë që ka ndodhur,” – shprehen ata.

Në reagimin e tyre, ata theksojnë se janë të vetëdijshëm që asnjë fjalë nuk mund të lehtësojë dhimbjen e familjeve që humbën fëmijët e tyre, ndërsa kërkojnë mirëkuptim në një moment kaq të rëndë.

“E dimë që asnjë kërkim faljeje nuk mund të kthejë jetët e humbura. Megjithatë, ndjejmë detyrimin moral dhe njerëzor të përulemi me respekt të thellë dhe të shprehim keqardhjen tonë më të sinqertë,” – vijon mesazhi i tyre.

Aksidenti i rëndë ndodhi në Durrës, ku automjeti i drejtuar nga Radaçi përplasi disa fëmijë në trotuar, duke shkaktuar një bilanc tragjik. Ngjarja ka shkaktuar reagime të forta në publik dhe ka rikthyer në vëmendje shqetësimin për sigurinë rrugore dhe drejtimin e mjeteve në gjendje të dehur.