Gjykata Federale e Lozanës ka rrëzuar apelin e biznesmenit 41-vjeçar, i identifikuar si “Thomas”, i cili ka pranuar vrasjen e bashkëshortes së tij, modeles Kristina Joksimovic, një nga rastet më të rënda kriminale që ka tronditur opinionin publik në Zvicër vitet e fundit.

Krimi ndodhi në shkurt të vitit 2022 në Binningen, pranë Bazelit, pas një konflikti të ashpër mes çiftit për çështje që lidhen me divorcin, kujdestarinë e fëmijëve dhe problemet financiare. Viktima, 38 vjeçe dhe nënë e dy vajzave, kishte qenë edhe finaliste e konkursit “Miss Zvicra”.

Sipas hetimeve, ajo u vra gjatë një grindjeje në banesën e tyre. Dokumentet gjyqësore theksojnë se autori ka ndërmarrë veprime të mëvonshme për të fshehur krimin, ndërsa raportet mjeko-ligjore kanë rrëzuar pretendimin e tij për vetëmbrojtje.

Hetuesit kanë vënë në dukje “mungesë empatie dhe ftohtësi” në sjelljen e të pandehurit pas ngjarjes, si dhe kanë ngritur dyshime për probleme të shëndetit mendor.

Ngjarja është cilësuar si një nga më tronditëset në vend, ndërsa dëshmitë e personave të afërt flasin për një marrëdhënie të tensionuar dhe episode të mëparshme dhune në çift.

Pas lajmit, ka reaguar edhe ish-Miss Zvicra, Christa Rigozzi, e cila e përshkroi viktimën si një grua “të bukur dhe zemërmirë”, duke shprehur dhimbjen për fatin e dy vajzave të saj.

Çështja mbetet në vëmendjen e drejtësisë zvicerane, ndërsa vendimi i fundit pritet të ndikojë në përfundimin e procesit gjyqësor ndaj të pandehurit.