Kreu i Partisë Demokratike, Sali Berisha, zhvilloi këtë të martë një takim me mbështetësit në zonën e Astirit në Tiranë, nga ku bëri thirrje për pjesëmarrje masive në protestën e paralajmëruar për datën 8 maj.

Në fjalën e tij, Berisha akuzoi ashpër qeverinë, duke pretenduar se Kryeministri Edi Rama dhe zëvendëskryeministrja Belinda Balluku kanë abuzuar me pushtetin dhe fondet publike në nivele të paprecedenta.

Ai deklaroi se opozita ka denoncuar vazhdimisht atë që e cilësoi si lidhje të qeverisë me krimin dhe deformim të proceseve zgjedhore, ndërsa shtoi se, sipas tij, këto qëndrime janë reflektuar edhe në dokumente ndërkombëtare, përfshirë raportin e miratuar në Komisionin e Jashtëm të Parlamentit Europian për Shqipërinë.

Gjatë fjalës së tij, Berisha vlerësoi qëndresën e banorëve të Astirit në protestat e mëparshme, duke e cilësuar atë si një shembull të rezistencës qytetare. Ai përmendi gjithashtu angazhimin e deputetit Klevis Balliu në mbështetje të banorëve të kësaj zone.

Duke iu referuar zhvillimeve politike të viteve të fundit, kreu i demokratëve tha se opozita ka arritur të “damkosë” qeverinë në arenën ndërkombëtare, ndërsa i bëri thirrje qytetarëve që të bashkohen në protestën e 8 majit, të cilën e cilësoi si një moment vendimtar.

“8 maji është dita jonë. Në rrugët dhe sheshet e Tiranës do të tregojmë se qytetarët janë zotët e këtij vendi”, u shpreh Berisha, duke theksuar se protesta synon, sipas tij, mbrojtjen e të drejtave dhe vlerave demokratike në vend.

Takimi në Astir vjen në kuadër të mobilizimit të opozitës për protestën e paralajmëruar, ndërsa mbetet për t’u parë pjesëmarrja dhe zhvillimi i saj në ditët në vijim.