Anëtari i Forumit Rinor të Partisë Demokratike, Oresti Berberi, ka hedhur akuza të forta ndaj drejtimit të Partia Demokratike e Shqipërisë dhe veçanërisht ndaj ish-kryetarit Sali Berisha, pas përjashtimit nga gara për drejtimin e partisë të Ervin Salianji.

Në një intervistë televizive, Berberi e cilësoi vendimin si të parashikuar, por tha se problemi kryesor nuk ishte refuzimi i kandidimit, por mënyra se si u menaxhua procesi brenda partisë.

“Ishte mëse e pritshme ajo që ndodhi me Salianjin, por mënyra si u mbyllën dyert ishte një inskenim i bërë nga vetë ata”, u shpreh ai, duke shtuar se brenda PD-së, sipas tij, ekziston një grup që nuk i hap rrugë figurave që kanë fituar përballë mazhorancës.

Berberi kritikoi ashpër drejtimin aktual të partisë, duke thënë se “humbësit i mbyllin derën fituesve”, ndërsa akuzoi lidershipin se nuk ka arritur të prodhojë fitore elektorale përballë Kryeministrit Edi Rama.

Ai pretendoi gjithashtu se janë përjashtuar struktura të tëra që kanë shprehur kundërshti brenda partisë, duke e përshkruar situatën si një krizë të brendshme organizative dhe politike në opozitë.

Deklaratat e Berberit vijnë në një moment tensionesh të brendshme në PD, ku debatet për drejtimin dhe proceset e brendshme zgjedhore kanë qenë të vazhdueshme në javët e fundit.