Ish-ministri i Mbrojtjes, Fatmir Mediu, ka vijuar mbrojtjen e tij në procesin gjyqësor që lidhet me tragjedinë e Gërdecit, duke kundërshtuar akuzat e Prokurorisë së Posaçme (SPAK) për “shpërdorim detyre”.

Gjatë seancës, Mediu ka deklaruar se po përballet me një proces ku, sipas tij, i atribuohen përgjegjësi që nuk bien në kompetencën ligjore të një ministri.

Ai ka vënë në pikëpyetje edhe provat e paraqitura nga SPAK, duke argumentuar se vendimmarrje dhe procedura të caktuara kanë ndodhur përpara urdhrave të tij si ministër, dhe jo si pasojë e tyre.

“Sipas meje, ajo që po ndodh në këtë proces është se prokuroria po ngarkon me përgjegjësi ligjore ministrin për një gjë që nuk është autoritet i tij ligjor. Kjo e bën situatën absurde”, është shprehur Mediu.

Ai ka pretenduar gjithashtu se përcaktimi i zonës së Gërdecit është bërë përpara nxjerrjes së urdhrit ministror dhe se procesi i kontratave dhe lëvizjes së pajisjeve ka nisur më herët, duke përfshirë edhe verifikime nga autoritete të huaja.

Mediu ka kundërshtuar edhe akuzat që lidhen me administrimin e municioneve sipas kalibrave, duke thënë se nuk ekziston një akt normativ që t’ia ngarkojë këtë përgjegjësi ministrit të Mbrojtjes.

Sipas tij, ekspertët e prokurorisë kanë pranuar mungesën e një rregulloreje të tillë, ndërsa ai ka paraqitur dokumente që, sipas tij, tregojnë se municionet janë trajtuar në përputhje me praktikat e përdorura në bashkëpunim me NATO-n dhe aleatë të tjerë.

Procesi ndaj Mediut vijon, ndërsa ai mohon çdo përgjegjësi penale në lidhje me ngjarjen e rëndë të Gërdecit.