Nikoll Radaçi ka dhënë dëshminë e tij lidhur me aksidentin tragjik në Durrës, ku humbën jetën dy fëmijë të mitur. Në deklarimet e tij përpara hetuesve, ai ka përshkruar momentet para përplasjes dhe rrethanat që, sipas tij, çuan në ngjarjen e rëndë.

Sipas Radaçit, gjithçka ka ndodhur pasi një automjet ka dalë papritur nga një rrugicë lagjeje, duke e detyruar atë të devijojë drejt trotuarit.

“Papritur nga një rrugicë doli një automjet, unë devijova për ta shmangur dhe përfundova mbi trotuar,” ka deklaruar ai, duke shtuar se nuk ka arritur të ndalojë mjetin dhe ka vijuar disa metra përpara.

Ai thotë se menjëherë pas ngjarjes ka dalë nga makina dhe ka kërkuar ndihmë në një dyqan pranë vendit të aksidentit, ku u ka kërkuar punonjësve të njoftojnë policinë. Më pas ka pritur në vend deri në mbërritjen e uniformave blu, të cilat e shoqëruan në komisariat.

Në deklarimet e tij, Radaçi ka mohuar të ketë pasur qëllim largimi nga vendi i ngjarjes, ndërsa ka deklaruar se nuk mban mend detaje të sakta për automjetin tjetër apo për fëmijët e përfshirë në aksident.

Ai ka pranuar gjithashtu se kishte konsumuar alkool para drejtimit të mjetit, duke thënë se kishte pirë një birrë në mëngjes.

Sipas të dhënave hetimore, 57-vjeçari akuzohet për “largim nga vendi i aksidentit” dhe “drejtim automjeti në mënyrë të parregullt”, ndërsa vijojnë hetimet për zbardhjen e plotë të rrethanave të ngjarjes.

Radaçi është me origjinë nga Mirdita dhe banues në Durrës, me arsim 7-vjeçar, sipas dokumenteve zyrtare.