Policia e Elbasanit ka ndaluar dhe shoqëruar një 53-vjeçar, i cili dyshohet se po transportonte 13 nxënës nën ndikimin e alkoolit me një mjet tip “Benz Sprinter”.

Sipas njoftimit zyrtar, shtetasi Sazan Jashar Gjolena, banues në Gjolene, është ndaluar pas një telefonate të bërë nga një qytetar në sallën operative të Cërrikut, i cili ka ngritur shqetësimin për sjelljen e dyshimtë të drejtuesit të mjetit.

Menjëherë pas sinjalizimit, shërbimet e Policisë së Postës Belsh kanë ndërhyrë dhe kanë ndaluar automjetin në aksin rrugor Belsh–Gjolene.

Testi i alkoolit ka rezultuar pozitiv në dy matje, përkatësisht 0.68 mg/l dhe 0.67 mg/l, duke konfirmuar se drejtuesi i mjetit ishte në gjendje të dehur gjatë transportit të nxënësve.

Shoferi është shoqëruar në Drejtorinë Vendore të Policisë Elbasan për veprime të mëtejshme procedurale, ndërsa ndaj tij pritet të merren masat ligjore përkatëse.

Ndërkohë, policia ka garantuar transportin e sigurt të nxënësve drejt destinacionit me një mjet tjetër të transportit publik, duke shmangur çdo rrezik të mëtejshëm.