Afrim Tafa është shkarkuar nga detyra e drejtorit të Policisë së Durrës, vetëm pak ditë pas aksidentit tragjik ku humbën jetën dy fëmijë të mitur.

Sipas burimeve zyrtare, Tafa është transferuar në një detyrë tjetër si shef sektori pranë Interpolit, funksion që e ka mbajtur edhe më herët në karrierën e tij.

Fillimisht, nga detyra janë larguar edhe zëvendësdrejtori i policisë dhe shefi i Policisë Rrugore në Durrës, si pjesë e masave administrative pas ngjarjes së rëndë të 3 majit, ku një automjet përplasi për vdekje dy fëmijë dhe plagosi një tjetër.

Ngjarja ka nxitur reagime të forta publike dhe ka vënë në fokus funksionimin e strukturave të rendit dhe sigurisë rrugore në qytet.

Në lidhje me situatën, drejtori i Departamentit për Rendin dhe Sigurinë Publike, Dhimitraq Ziu, prezantoi masa të reja për rritjen e sigurisë në rrugë.

Ai bëri të ditur se Policia Rrugore është pajisur me dronë, kamera, aparate alkooltestues dhe drogëtestues, si dhe me mjete për matjen e shpejtësisë.

Ziu theksoi se kontrollet do të mbështeten gjithnjë e më shumë te teknologjia dhe patrullat e lëvizshme, ndërsa shkeljet do të dokumentohen dhe ndëshkohen në kohë reale.

Sipas të dhënave të bëra publike, vetëm në katër muajt e parë të vitit janë vendosur mbi 330 mijë masa ndëshkuese për shkelje të ndryshme të Kodit Rrugor, përfshirë shpejtësinë, drejtimin në gjendje të dehur dhe mungesën e lejes së drejtimit.

Autoritetet theksojnë se aksidentet rrugore mbeten problem serioz, ku shpejtësia dhe sjellja e papërgjegjshme e drejtuesve të mjeteve vijojnë të jenë shkaktarët kryesorë të ngjarjeve fatale.