Një mesazh kërcënues ndaj kryeministrit në detyrë të Kosovës, Albin Kurti, është publikuar dje nga grupi i njohur si Severna Brigada, duke ngritur shqetësime për sigurinë dhe klimën politike në vend.

Në mesazhin e bërë publik nga grupi në fjalë thuhej: “Sa të lindë agimi mbi Kosovë, Albin Kurti do të jetë i vdekur”, deklaratë që konsiderohet si një përshkallëzim i retorikës kërcënuese ndaj institucioneve të Kosovës.

Severna Brigada është përmendur edhe më herët në lidhje me incidente dhe kërcënime me prapavijë ekstremiste në veri të Kosovës.

Lidhur me këtë kërcënim reagoi vetë Albin Kurti, i cili deklaroi se pjesëtarët e kësaj organizate nuk kanë vend në Kosovë dhe kujtoi se institucionet e kanë shpallur atë organizatë terroriste që në vitin 2023.

“Po, ne i kemi shpallur ata organizatë terroriste më 29 qershor të vitit 2023 dhe këto kërcënime që i bëjnë ata janë veçse dëshmia më e re se janë ashtu siç i kemi shpallur dhe se nuk kanë vend në Republikën e Kosovës. Të gjithë pjesëtarët e të ashtuquajturave ‘Brigada Veriore’ janë kriminelë, janë terroristë, të cilët kanë bërë zullum në Kosovë në të kaluarën, por koha e tyre në Republikën tonë ka kaluar. Fatkeqësisht, ata janë të lirë dhe vazhdojnë që të kenë ndikim në Beograd”, u shpreh Kurti.