Kreu i Grupit Parlamentar të Partia Socialiste e Shqipërisë, Taulant Balla, ka ironizuar foltoren e zhvilluar nga Partia Demokratike e Shqipërisë përpara Kryeministrisë, duke kërkuar sqarime lidhur me procedimin e tre shtetasve italianë pas protestës së opozitës të mbajtur më 8 maj.

Përmes një reagimi në rrjetet sociale, Balla iu referua pjesëmarrësve në protestë si “krushq”, ndërsa ngriti pyetje mbi përfshirjen e shtetasve të huaj në incidentet e dhunshme të regjistruara gjatë tubimit.

“Përtej ‘krushqve’ të sotëm, në protestën e të premtes Policia e Shtetit ka proceduar tre shtetas italianë për sulm me gurë dhe molotov ndaj Policisë së Shtetit. Partia Demokratike i detyrohet publikut një përgjigje për këtë përfshirje të shtetasve të huaj në dhunën e protestave”, shkroi Balla në Facebook.

Deklarata e Ballës vjen pas tensioneve të regjistruara gjatë protestës së opozitës në Tiranë, ku pati përplasje mes protestuesve dhe forcave të policisë, si dhe përdorim të mjeteve piroteknike dhe molotovëve pranë institucioneve shtetërore.