Sekretarja për Marrëdhëniet me Publikun në Partia e Lirisë, Arla Merja, ka akuzuar drejtësinë për standarde të dyfishta gjatë fjalës së mbajtur në foltoren e opozitës para Kryeministrisë.

Në deklaratën e saj, Merja u ndal te masa e sigurisë ndaj Ilir Meta, duke e krahasuar me mënyrën se si, sipas saj, trajtohen zyrtarë të tjerë të lartë të përfshirë në hetime.

“Sot në Gjykatën e Posaçme ish-presidenti i Republikës, Ilir Meta, qëndroi pas një kafazi të xhamtë si një kriminel i rrezikshëm. Mbi 18 muaj burg pa gjykim të plotë, pa kamera, pa transparencë. Ne pyesim: A është kjo drejtësi?”, deklaroi ajo.

Merja përmendi gjithashtu emrin e ish-zv/kryeministres Belinda Balluku dhe ish-drejtoreshës së AKSHI-t Mirlinda Karçanaj, për të cilat tha se ndodhen të lira pavarësisht akuzave dhe hetimeve të përfolura publikisht.

“SPAK e di, dosja ekziston, por parlamenti me 83 mandatet e krimit e bllokoi arrestimin e saj. Kjo nuk quhet drejtësi, kjo quhet mburojë politike”, u shpreh Merja.

Ajo ngriti akuza edhe ndaj mënyrës së funksionimit të sistemit të drejtësisë, duke pretenduar se opozita përballet me masa ekstreme, ndërsa përfaqësues të pushtetit gëzojnë imunitet.

“SPAK për opozitën dhe imunitet për pushtetin. Dy standarde, dy Shqipëri”, deklaroi përfaqësuesja e Partisë së Lirisë.

Në fund të fjalës së saj, Merja u bëri thirrje qytetarëve për pjesëmarrje në protestat opozitare dhe reagim kundër asaj që ajo e cilësoi si “drejtësi me standarde të dyfishta”.

“Kur drejtësisë i diktohet se cilin e burgos dhe cilin e lë të lirë, ajo nuk është më drejtësi, por diktaturë me toga”, përfundoi ajo.