Kreu i Partia Demokratike e Shqipërisë, Sali Berisha, ka mbajtur këtë të hënë fjalimin e radhës në foltoren para Kryeministrisë, ku hodhi akuza të forta ndaj kryeministrit Edi Rama dhe zëvendëskryeministres Belinda Balluku, duke i cilësuar përgjegjës për korrupsion dhe bllokimin e integrimit europian të vendit.

Në fjalën e tij para mbështetësve demokratë, Berisha deklaroi se “dyert e integrimit të Shqipërisë në Bashkimin Europian po mbyllen nga dyshja Rama-Balluku”, ndërsa akuzoi qeverinë për vjedhje me projektet infrastrukturore, përfshirë Tunelin e Llogarasë dhe Aeroportin e Vlorës.

“Tuneli i Llogarasë janë vjedhur 90 milionë euro, aeroporti i Vlorës për të vjedhur sa më shumë do ta shpallnin aeroportin më të madh të Ballkanit. Të pafytyrë si këto nuk ka parë toka”, deklaroi Berisha.

Ai shtoi se kostot e rrugëve në Shqipëri janë shumëfish më të larta se në vendet e rajonit, duke bërë krahasim me Greqinë.

“Në një kohë kur këtë vit Greqia po ndërton përtej Kakavijës autostradë me 4 milionë euro kilometri, këtu kilometri ndërtohet me 20 milionë euro”, u shpreh kreu demokrat.

Berisha sulmoi edhe mënyrën si po trajtohet ish-presidenti Ilir Meta në proceset gjyqësore, duke e cilësuar të papranueshme paraqitjen e tij “në kafaz” gjatë seancave.

“Nuk pajtohemi me një narkodiktator që sjell në kafaz ish-presidentin dhe ish-kryeministrin për të mbjellë terror te qytetarët”, tha ai.

Në përfundim të fjalës së tij, Berisha u bëri thirrje qytetarëve të vijojnë protestat, duke e cilësuar betejën e opozitës si “një mision historik për shpëtimin e Shqipërisë”.