Ilir Meta ka reaguar pas seancës gjyqësore të zhvilluar këtë të hënë, ku u vendos që dosja “Meta-Kryemadhi” të gjykohet e bashkuar, ndërsa për tre të pandehur të tjerë u pranua gjykimi i shkurtuar.

Përmes një reagimi në rrjetet sociale, Meta deklaroi se vetë Prokuroria ka rrëzuar, sipas tij, akuzën kryesore që lidhej me pretendimin për një lobim prej 1 milion dollarësh për një fotografi me presidentin amerikan Donald Trump.

“Sot, në seancën e radhës të gjykimit në themel, vetë Prokuroria rrëzoi akuzën kryesore ndaj meje për gjoja lobimin 1 milion USD për një foto me Presidentin Trump”, shkroi Meta.

Sipas ish-presidentit, prokurori ka pranuar në sallën e gjyqit se bëhet fjalë vetëm për një pagesë prej 15 mijë dollarësh ndaj kompanisë McKeon Group, të cilën ai e cilësoi si të ligjshme.

“Para gjykatës prokurori pohoi se bëhet fjalë vetëm për një pagesë të ligjshme prej 15 mijë USD për McKeon Group, pikërisht ajo që kam deklaruar publikisht, por edhe në SPAK, që para 3 vitesh”, u shpreh Meta.

Në reagimin e tij, ai sulmoi gjithashtu mediat ndërkombëtare Mother Jones dhe Kronen Zeitung, duke pretenduar se publikimet e tyre ishin “të sponsorizuara” dhe u përdorën si bazë për ngritjen e akuzave ndaj tij.

Meta e cilësoi procesin ndaj tij si “izolim politik”, ndërsa shtoi se edhe akuzat e tjera, sipas tij, “do të çmontohen njëra pas tjetrës”.