Presidenti i Ukrainës Volodymyr Zelensky ka deklaruar se luftimet me ushtrinë ruse kanë vazhduar edhe gjatë një armëpushimi tre-ditor të ndërmjetësuar nga Shtetet e Bashkuara, duke akuzuar Moskën se nuk synon përfundimin e luftës.

“Sot, nuk pati heshtje në front, pati beteja. Ne vumë re gjithçka. Gjithashtu vërejmë se Rusia nuk ka ndërmend t’i japë fund luftës. Fatkeqësisht, ajo po përgatit sulme të reja”, tha Zelensky.

Deklarata e tij vjen në një moment kur presidenti rus Vladimir Putin ka pretenduar më herët se lufta në Ukrainë është drejt përfundimit, një qëndrim që hidhet poshtë nga pala ukrainase në terren.

Zelensky theksoi se situata në vijën e frontit mbetet aktive dhe se nuk ka pasur ulje të intensitetit të luftimeve, pavarësisht nismave për armëpushim.