Tre shtetas italianë janë mes gjashtë personave të vënë nën hetim për incidentet gjatë protestës së 8 majit të organizuar nga Partia Demokratike, ku pati përplasje dhe hedhje molotovësh ndaj Policisë së Shtetit.

Sipas ekspertit të kriminalistikës Ervin Karamuço, të rinjtë Fabio Perabello (23 vjeç), George Cau (25 vjeç) dhe Houssem Bousrih (24 vjeç), dyshohet se janë përfshirë në akte dhune dhe mund të jenë pjesë e grupeve të organizuara për pagesë.

“Po hetohet qëndrimi i paligjshëm, shkelja e kufirit tokësor; janë disa rrethana që policia ka ngritur dyshime. Dy prej italianëve nuk dalin në TIMS, njëri ka hyrë nga Kosova. Njëri prej tyre ka emër arab. Nga të dhënat që na referohen, di të them që nuk kam parë turistë me maska duke bërë veprime të dhunshme”, deklaroi Karamuço.

Ai shtoi se autoritetet kanë sekuestruar tabulatet telefonike dhe po verifikojnë lëvizjet dhe kontaktet e tyre në Shqipëri.

“Ka një mosrakordim mes këtyre personave… përpara deklarimeve zyrtare ka pasur deklarime që edhe mund të jenë paguar, por policia po heton si kanë ardhur dhe kush i ka futur në turmë. Janë pjesë e grupeve që bëhen mercenarë shumë lehtë”, u shpreh ai.

Hetimet vijojnë për të zbardhur mënyrën e hyrjes së tyre në vend dhe rolin e mundshëm në aktet e dhunës gjatë protestës.