Universiteti i Arteve ka shënuar 60-vjetorin e themelimit me një sërë aktivitetesh festive, ku një ditë më parë u ndanë certifikata mirënjohjeje për mbi 30 personalitete që kanë kontribuar në zhvillimin e institucionit dhe formimin e artistëve të rinj.

Në aktivitet mori pjesë edhe ministri i Turizmit, Kulturës dhe Sportit, Blendi Gonxhja, së bashku me personalitete të artit, pedagogë, drejtues dhe studentë të Universitetit të Arteve.

Në fjalën e tij, Gonxhja vlerësoi rolin e këtij institucioni si një hapësirë jo vetëm akademike, por edhe kulturore dhe intelektuale, ku janë formuar breza artistësh që kanë përfaqësuar Shqipërinë në skena ndërkombëtare.

“Universiteti i Arteve ka qenë një hapësirë lirie, guximi dhe mendimi kritik në Shqipëri. Pedagogët kanë ruajtur traditën dhe kanë përcjellë pasionin për artin te brezat e rinj”, u shpreh ai.

I themeluar në vitin 1966, institucioni ka kaluar disa transformime strukturore, duke nisur si Instituti i Lartë i Arteve, më pas Akademia e Arteve dhe që prej vitit 2011 funksionon si Universiteti i Arteve, me fakultete në muzikë, arte të bukura dhe art skenik.