Rastet e raportuara së fundmi për vetëvrasje dhe tentativa vetëvrasjeje tek të rinjtë kanë rikthyer në fokus rëndësinë e shëndetit mendor dhe nevojën për diskutim më të hapur mbi këtë temë.

Në këtë kontekst, psikologia dhe psikoterapistja psikodinamike Froso Fotinaki ka dhënë një mesazh sensibilizues mbi atë që fshihet pas mendimeve vetëvrasëse, duke theksuar se ky fenomen nuk është vetëm lokal, por prek shumë vende, përfshirë edhe Greqinë.

Sipas saj, vetëvrasja nuk duhet parë si shenjë dobësie, por si pasojë e një dhimbjeje të thellë emocionale dhe ndjenjës së mungesës së rrugëdaljes.

“Njerëzit që mendojnë për vetëvrasje nuk duan domosdoshmërisht të vdesin. Ata duan që dhimbja e tyre të ndalet”, shprehet ajo.

Psikologia thekson se shenjat paralajmëruese shpesh janë të heshtura, si izolimi, ndryshimet e papritura në sjellje apo “lamtumirat” indirekte, të cilat nuk duhen injoruar.

Ajo nënvizon se hapja e diskutimit nuk e nxit fenomenin, por përkundrazi mund të ndihmojë në parandalim, duke i bërë personat në vështirësi të ndihen të dëgjuar dhe të kuptuar.

Sipas saj, dhimbja emocionale nuk duhet minimizuar dhe çdo shenjë duhet trajtuar me seriozitet, mbështetje dhe ndihmë profesionale.

Në mesazhin e saj drejtuar të rinjve, ajo shton:

“Nuk je vetëm. Dhimbja që po ndjen është reale, por ka njerëz që mund të të ndihmojnë. Fol me dikë që i beson, me një mik, familjar apo profesionist të shëndetit mendor. Jeta jote ka vlerë.”

Në fund, ajo kujton rëndësinë e kërkimit të ndihmës dhe rolin e linjave të emergjencës dhe këshillimit si 116 111, 116 117, 127 dhe 112.