Njësia anti-drogë e Janinës ka goditur një rrjet të dyshuar trafiku droge, pas një ndjekjeje me automjete që përfundoi me arrestimin e një shtetasi shqiptar dhe sekuestrimin e një sasie të madhe narkotikësh.

Ngjarja u zhvillua mëngjesin e sotëm në zonën e Konicës, kur forcat e policisë vunë re një automjet me targa të huaja të dyshuara si të falsifikuara, i cili po lëvizte në drejtim të Kozanit.

Pas sinjalit për ndalim, drejtuesi i mjetit nuk u bind dhe u largua me shpejtësi të lartë, duke kryer manovra të rrezikshme dhe duke hyrë edhe në korsi të kundërt, duke rrezikuar përdoruesit e tjerë të rrugës.

Ndjekja përfundoi në një rrugë rurale pranë Papigos, në zonën e Zagorit, ku policia arriti të bllokojë automjetin dhe të arrestojë drejtuesin.

Gjatë kontrollit, u gjetën 28 pako me gjithsej 167 kilogramë e 200 gramë kanabis, të fshehura në pjesë të ndryshme të makinës.

Sipas autoriteteve greke, automjeti mbante targa të falsifikuara, ndërsa i arrestuari rezulton se ndodhej në Greqi në mënyrë të paligjshme.