Gjykata e Lartë ka vendosur që ish-drejtoresha e AKSHI (Agjencia Kombëtare e Shoqërisë së Informacionit), Mirlinda Karçanaj, të mos jetë më e detyruar të qëndrojë e mbyllur në një nga adresat e deklaruara prej saj si masë sigurie, pas ndryshimeve të fundit në vendimin gjyqësor.

Menjëherë pas këtij zhvillimi, ajo ka folur për herë të parë në emisionin “Top Story”, duke deklaruar se është përfshirë në një proces që, sipas saj, nuk e përfaqëson realisht.

“Unë nuk kam zgjedhur të hesht, por e kam pasur të pamundur të flas. Jam gjendur befas në një botë që isha e papërgatitur… Kam jetuar e mbyllur jo vetëm brenda katër mureve, por me atë ndjesinë e fajësisë së paracaktuar,” u shpreh ajo.

Karçanaj tha se ka ndjerë presion dhe gjykim publik, duke shtuar se është trajtuar si “një emër në një dosje dhe jo si njeri”.

Ajo theksoi gjithashtu se çdo proces duhet të hetohet dhe çdo përgjegjësi të verifikohet, por sipas saj pa paragjykim publik dhe pa poshtërim.

Hetimet ndaj saj

Mirlinda Karçanaj, e cila ka drejtuar për një periudhë të gjatë AKSHI (Agjencia Kombëtare e Shoqërisë së Informacionit), është marrë e pandehur për “shkelje të barazisë në tendera”, në kuadër të hetimeve që përfshijnë edhe persona të tjerë dhe kompani të lidhura me prokurime publike.

Sipas dosjes hetimore, akuzat lidhen me procedura tenderimi dhe dyshime për veprime të kryera në bashkëpunim në kuadër të një grupi të strukturuar. Hetimet vijojnë.