Dëgjesa e radhës për reformën e re territoriale është zhvilluar këtë të premte në Shkodër, ku bashkëkryetari i komisionit për reformën, Arbjan Mazniku, theksoi nevojën për rishikimin dhe forcimin e organizimit vendor pas një dekade nga zbatimi i reformës së parë territoriale.

Sipas Maznikut, ndryshimet demografike, eficienca e funksionimit të bashkive dhe procesi i integrimit europian kërkojnë një qasje të re për mënyrën se si organizohet pushteti vendor në vend.

Ai u ndal edhe te katër sfidat kryesore me të cilat përballen aktualisht bashkitë, duke theksuar se reforma e re duhet të adresojë problematika që lidhen me administrimin lokal, ofrimin e shërbimeve, zhvillimin ekonomik dhe përfaqësimin qytetar.

Mazniku deklaroi se procesi i dëgjesave do të vijojë edhe në qytete të tjera të vendit, me synimin për të mbledhur propozime dhe shqetësime nga komunitetet lokale për reformën e ardhshme territoriale.